القائمة الرئيسية

الصفحات

أخر الأخبار


شعر / عبدالله الهادي

رجع شريط الحياة
وافتح كتاب اللى فات
واتملا م الذكريات
أوقات آساها مليك
والمحنى وانا بارقيك
ساعة مادمعك سال
والهم حط وشال
واتعكرت معانيك 
ركز عينيك ع الهدف
تعرف بإن الصدف
متحبكة حواليك
لو كان باديك مُرتبك
سيب الحدود تشتبك
ومداها يسرح بيك
منك وليك وعليك
قصر الكلام او طال
زاد العيار او قل
ضل الخيال بطال
لو ضى عودك مل
والحل لو هيخيب
عمر النيشان مايصيب
ويسب اثر فيا
الصورة مخفية
والخية فى النيجاتيف
كل اللى فات طراطيف
والوصف كم وكيف
خالى من التخريف
وخفيف على سمعك
مين اللى قاد شمعك
وقت العناد ماطفاه
ساعة ما غنت اهـ
على تخت ايامك
سهم التزامك طاش
عشق فى لب بلاش
فا بلاش تعيش الدور
طول م الشعور بكاش
قطر الحياة قشاش
بيلم ويفرق
وانا وانت فى التساهيل
ويا السبيل بندور
خش الطابور حازى
واياك ترازى الخط
مط الوسع جوك
وادى رضاك بوسة
الدنيا ملبوسة
والحوسة جوازى
لوكان صفاك نازى
اعمل لروحك زار
متعومش فى الأعذار
مهما القرار دانك
واسبح فى الغازى
ينفك ادمانك
يرجع كيانك حى
ويوصلك للضى
وتهل بعد غيوم
شرق مع المقسوم
غرب مع المكتوب
بين النهار والليل
جوة النصيب بندوب
سالب على مسلوب
غالب على مغلوب
وقلوب بتتهنا
 وقلوب بتتعنا
وقلوب بتتمنا
الستر م المعبود
خللى الحضور مشهود
واشطب بنود البور
لحظة عبور الويل
اثبت وشد الحيل
وادى الدليل تحصين
يخضر فيك العود
آخر حدود القول
كتر القساواة غول
وعشان تكون مقبول
خللى الأصول دارك
والطيبة انوارك
والجدعنة أرغول
هل اعجبك الموضوع :

تعليقات