القائمة الرئيسية

الصفحات

أخر الأخبار

ياما الهدوم بتدارى


شعر / شيماء الغياتى
الإسماعيلية
 
ياما الهدوم بتداري
جواها بنى آدمين
وياما حاوية أفاعى
وف سمهم تعابين
وياما البيوت مقفولة
على نار وحقد دفين
ف ظاهرها فرح وسكن
وتشوفها ليلى يا عين
والحب مات واتدفن
واهو كلنا رايحين
وياما قلوب حيرانة
مجروحة م الخاينين
وتشوفها ترسم راحة
وهى نوح وانين
وياما تشوف لعيون
تضحك تجلجل رنين
و لو كلمة تفتحها
تملا دموع العين
وياما ناس فالصو
تتباهى بالملايين
الشبعة بعد الجوعة
مليان فراغة عين
الفقر مش عيبة
مادام رب العباد راضى
وان قلنا نمشى يمين
قالوا شمال فاضى
لا سابونا فى حالنا
ومالك ومالنا يا قاضى
ان نصبوك الحكم 
للعدل ليه رافضين
دنيا غرورة جهولة
وكله رد لدين
ومهما حاول الولد
عن فعله مش راضيين
وحاله اصبح عجب
وهما كده عاوزين
وشماتة مالها حد
ولربهم ناسيين
لو طير ف يوم يعلى
مسيره يوم للطين
جرب تدوق الهنا
وللوجود تعشق
وعيش جمال الحياة
اعقلها واتروق
لا عمر حزن هينفعك
ومسيرها تتروق
والهم اكبر مرض
ييتعبنا ويفوق
متعيش ومتع دنيتك
واضربها بالكازلاك
والحظ لو جه لبابك
اوعاك تديله ضهرك
احضن هواه واشركه
ودوب كمان واغرق
دا اللحظة مبترجعش
والدنيا مبتشكرش
وان كلت رومى ف يوم
المعدة مبتحمدش
ياما ناس كتير رحلت
ولا كانهم جم يوم
وناس كتير عايشة
وميتين بالكوم
والطيبة دى زايدة
حسبوها ببلاهه
والندل سعره عليي
والواطى يتباهى
والاصل مهما ابتلى
اصله بيندهلله
مش عيب غلطنا ف يوم
لكن الغلط جهله
ولو نرد لحالنا
اكيد هننسى اللوم
خشب الهموم اتحرق
اغصانه شوك مسنون
لو قالوا دى خيانة 
انك تعيش محروم
ولو على الظالم
دايما ييجى له يوم
والحق لو يوم حكم
لا يبات عليها مظلوم
فابدأ بنفسك وطبق
هنبقى أد الكون
والعبرة بالخواتيم
والصدق بس يدوم
فاعمل لدنياك وعيش
ولا تنسى يوم الدين
مسيرنا ف الآخرة نتلاقى
وكله سلف ودين
قدم لسبتك يوماتى
حدك هيبقى اتنين
واغفر وسامح وراضى
قول للشيطان يا رجيم
وسم باسم الله
وصلاة لطه الزين
هل اعجبك الموضوع :

تعليقات