القائمة الرئيسية

الصفحات

أخر الأخبار


شعر/ عبدالله الهادي
....................
يابن الوطن ياللى
عاشق وعشقك نيل
عللى القلوع عللى
واطوى الربوع يا أصيل
شيل الأساس ع الراس
خللى الشهامة دليل
بالجد والإخلاص
اسعى وشد الحيل
ضى التاريخ وناس
والمجد مالو مثيل
الماضى صب الكاس
وسقانا جيل ورا جيل
قناديل ورا قناديل
والضى متوالى
وعلمنا فى العالى
وعرقنا فى المنديل
سيل الوفا فيضان
بيصب فى عروقها
مصر اللى زوقها
سحر وسلام وأمان
الحب ترياقها
والود بالألوان
طول الزمان بتجود
وعطاها مالو حدود
خيرها شراع مفرود
والملحمة عنوان
يادفة الملايين
دورى فى كل مكان
آن الآوان .. والعمل
يفتح لبكرة بيبان
نسمع بيان الأمل
والمحتمل هيبان
بين الغيطان والمصانع
زودو المنسوب
مطلوب تدور الرحا
يا عاشق الأوطان
داخل ميدان التفانى
زود الغليان
ساعة تبان همتك
هتلاقى صعبك هان
عين الزمان تلمحك
وبرمشها تغطيك
تقطف إيديك العطا
من دنيتك الوان
اروى عيدان المبادئ
بالصلاح ترتاح
خللى إنتمائك يلالى
والكرامة صباح
وافرد جناح التحدى
لجل مانعدى
مدك ومدى تمللى
للرخا مفتاح 
ملاح صفاتك معانى 
ضيها مشهود
والاحترام معبدك
مالى الوجود بالجود
حافض بنود التزامك
والحيا هندام
الحلم شد حزام 
والعشق مكنونك
الأسم مصرى
وصيتك لقب متعافى
امين ومخلص وصادق 
والضمير صافى
سيرتك مطافى  
وصورتك
فى العلالى فنار
رافع شعار الكنانة
والكرم وافى
يلا نجافى الكسل
والعزم يبقى سلاح
علشان نطول الأمل
والجى يبقى براح
ونشوف صباح الوطن
خالى من الأهوال
هزو الهلال واطلعو
عامل على فلاح 
لحن النجاح لو عزف
هايغير المفهوم
ورياح حاضرنا هتهدى
لو قدرنا نقوم
تعالو نمحى غيوم 
الغش والتضليل 
حيل الولاد لو رمح
هتزقزق الأفراح
هل اعجبك الموضوع :

تعليقات