القائمة الرئيسية

الصفحات

أخر الأخبار

========

شعر.. هدى عبدالله
الإسماعيلية
--------------

 هو انت ايه..
 حابب تشوفني ! 
وحشك الوجد
 اللي بيا.! 
و دموع كتير
 باينة ف عنيا
واللا حابب تبتسم
 وقت اما ادمع
واللا جي بتحيي
 فيا حاجات تقطع
 حابب تشوفني
بعد كل سنين جفا
 باتت ف حضني.! 
بعد ما ناح الغراب 
على سطح قلبي
بعد ما هجرك
 سكنني
 كأنه جني
لا صحيح
 حابب تشوفني؟! 
جايبلي ايه معاك
 النهاردة
ود فالصو زي عادتك
 واللا وردة
واللا جي تطوي
 اللي فات
و من جديد
 تعمل معاهدة
بعد كل غياب
 بطوله
عندك ايه حابب
 تقولو 
 لو مطرحك
 اتمنى اموت
منتهى الجبروت
 ده طبعك
َمنتهى الجبروت
تقدر تفوت
 جوه الجراح
من غير تردد
 شيء كده
 معدي الحدود
جي بتتفرج عليا 
إن كنت ناسية
واللا فاكرة
 بطمنك.. 
 انا لسه فاكرة
ورغم كل الجرح ده
 انا بردو قادرة
قادرة اعيش
 على ذكرى حبك
ايام ماكان القلب
 ملكك
وافتكر حبي
 اللي كان بيزيد 
في بعدك
حتى لو ما طالش
 قربك
ياما ناديت
 ماوصلشي
 قلبك ندهتي
 ولا حس بيه
عارف ده كله
 بعيشه ليه 
بشهد الايام
 عليك
فلما مرة تجيني
 تاني 
ماخلي قلبي
 يحس بيك
مش كل مرة
 دمعي يجري
قبل مني
 ويعاديني
 ويهاديك
  غدر قلبك
شوه الوش اللي
 كان يضحك
 لصورتك 
دغدغ الايام
 ف مطحنة الغياب 
يطحن ف سيرتك
 داست عليا قسوتك 
شديت رحيلك 
وانت بتعقد نيتك
وتشد حيلك
 و ملهي عني
  بغربتك
ولا عارفة فينك .
 شمس عمري
 ساعتها
 غابت يوم
 ما غبت و اختفيت
 و بدون سبب
والفراق جمر
 وحطب 
بيزيد لهب
يسهر الليل الطويل
 على ضي حزني
و ذكريات مثلتها
 قاعدة تجالسني
 كل ايامي
 اللي كانت
حلوة بيك
كل أحلامي اللي
 كانت بس ليك
كل دنياي اللي
 كانت
 حاجة تانية 
اتشتت و اتبدلت
وف ظرف ثانية
بقيت بديل
تمثال جميل
ريبوت بيضحك
 للوشوش
مايهمهوش
 الصدق محفور 
ف الملامح
واللا لسه
 الحزن فالح
يكشفه
 ومايستروش
وأدت كل حاجة
 كانت حلوة فيا
وفضلت استناك
 سنين تسأل عليا
نفس اشوف وشك 
وعينك
 لو ف يوم تيجي
 ف عنيا 
والهوا اللي
 كان ساجني 
بطيره أدام
 عنيك
عشان مايفضلوش
 مكان ولا حتى غية
حابب تشوفني ! 
يا احلى ذكرى 
دونت ايام غبية
قدرت جدا
 و الأكيد  
عرفت تعمل
 مني فعلا
واحدة تانية...!
هل اعجبك الموضوع :

تعليقات