القائمة الرئيسية

الصفحات

أخر الأخبار

ما لا نعرفه عن شادية الإنسانة

ما لا نعرفه عن شادية الإنسانة
كتبت سلوي ياسين الإسماعيلية

في مسرحية ريا وسكينة الممثلين بياخدوا أجورهم في المسرحية كل ١٥ يوم لكل ممثل ظرف خاص بيه إلا شادية الأعلى أجر بتاخد ٤١ ظرف ،واحد مليان فلوس وده أجرها عن دورها في المسرحية وأربعين ظرف فاضي. 

الست شادية بتاخد الفلوس من الظرف المليان وتحطهم في الأظرف الأربعين الفاضية، وتمر على عمال المسرحية والكومبارس وتدي لكل واحد ظرف اللافت للنظر إن شادية مش بتستدعيهم ولا تبعت لهم حد ولكنها بتروحلهم بنفسها ...

وده مش غريب على شادية اللي لما عرفت إن الممثلة سميحة توفيق (الهبلة الحماره أم بدوي في المسرحية) مريضة بالكبد قعدت تصرف على علاجها لمدة تقترب من ٣٠ سنة حتى وفاة سميحة توفيق في ٢٠١٠ ..

في بداية التمانينات شادية عرفت إن الدكتور مصطفى محمود بيبني مركز طبي عند مسجده بشارع جامعة الدول العربية بالمهندسين عملت ايه؟ اتبرعت بشقتها لبناء أول وحدة لاكتشاف مرض السرطان وكانت الشقة سبع غرف. 

 قيمتها وقتها كان ١٥٠ ألف جنيه يعني أكتر من ١٠ مليون جنيه حاليا وسكنت شادية مع والدتها في شقة إيجار عند حديقة الحيوان بالجيزة ، اتبرعت كمان  بأرض بتاعتها في حي الهرم لبناء مجمع طبي(ما عندكم ينفد وما عند الله باق)

رحم الله شادية الإنسانة وأسكنها فسيح جناته.
هل اعجبك الموضوع :

تعليقات