القائمة الرئيسية

الصفحات

أخر الأخبار

المحبة كوم صور
----------------------
شعر- هدى عبدالله
الإسماعيلية
---------------
المحبة مش
 مسح جوخ 
ولا صورة
 جوه الكادر
 بتعلي المقام 
المحبة روح 
تروح
 لود صافي
وعطر 
مليان بالأمان 
هي كمان 
مابقتشي سيلفي
ولا شئ بيخفي 
قدرتك ع الانسجام
او حتى بسمة عريضة
 راسمة في وشها
قلب اللئام
و ساعات تكون
 صورة لذكرى 
ف ضي لمبة
 واللا في حضرة قمر 
المحبة
ذكريات صورة لقلبك
قبل اما وده ينكسر
المحبة ضحكة صافية
ماليها فرحك
صورة حلوة تبص فيها
لما قلبك يشتهيها
وتوحشك فيها ملامحك
لقطة لمحبة بريئة
بتطيب الأحزان ف جرحك
المحبة كوم صور
لألف ذكرى 
لقطّها امبارح 
عشان ما تعيشها بكرة
 البوم وشوش مليان
سعادة قديمة جدا
وقت اما كانت
القلوب بتحب فعلا
فان حبوا مرة
 يقصقصوا ود ابتسامتك
يشطبوا م الكادر قيمتك
يبقا الغلط كل الغلط
 جي م القلوب
اللي شايفة الروح
 ف طيبتك دي..
 عيوب ! 
بيعاملوا فيك بالخد وهات
وانت مش عارف تتوب
عن محبة شايلها ليهم
واللا ذكرى عايشة فيهم
افهم بقا ومن غير حماس
طقطق بقا كل الحواس
خلي بالك هما ناس
أخده ع الوش
 اللي خاين ضحكته
 ابو كادر باش
وبقولك إيه هي دي الدنيا
اللي ياما بعدت عنها 
معشتهاش 
ماتخليناش نعمل قضية 
من بدرى صادر حكمها
مافيهاش نقاش
لم الصور ف قلب حجرك
حتى لو هاتكون لوحدك
عمنا بتاع الصور
ابو كادر طيب
راح مجاش
وان حد منهم صورك
أو حتى حاول يبهرك
قوله  بلاش 
معادتشي حاجة تشدني
لا كدبة حلوة ف كلمتين
 ولا ضوء قاصدني من فلاش.
هل اعجبك الموضوع :

تعليقات