القائمة الرئيسية

الصفحات

أخر الأخبار

شيزوفرينيا...!



شعر - هدى عبدالله

الإسماعيلية 


وتفضل شدتي مركب

بقدف بيها ع الأحزان

واشوف ايامي بتكركب

طيبتي وحيرتي 

ع الحرمان

وبوفي للصحاب دايما

وبطلع منهم الخسران

ماليش نصيب ولا نايب

غير الحيرة مع التوهان

واطبطب ع اللي

 راح مني

الاقي حبايبي تخذلني

وبضحك للي كارهني

ولا بالقلب بكرههم 

وليه معرفشي كارهني

واقدف بالوفا و اروح

واقدم فرحتي والروح

وبرجع والفؤاد مجروح

وعشمي تملي يهزمني

تمر أحلامي ادامي

أقول يمكن هاتتفسر

يعدي العمر ادامي

فايتني أملي متكسر

و روح اليأس بخنقها

عشان ماتجيش

وساعة بؤس امزقها 

ولا تعديش

ما بين صحبة فضلت 

احاوطها وارقيها

وبين قلوب فضلت 

اداديها واراعيها 

وبين روحي اللي

 مش عارفة 

تداويني واداويها

يا بتخانق مع نفسي

عشان مكونش

 غير نفسي

عشان اقدر أكون غيري

واتغير بحذافيري

واوقف كل تفكيري

واتقلب على نفسي

واتغلب على مبدأ

كنت بعيشه واتمزق

من مركب شدتي طالع

مع الحيرة بكون والع

لا أنا عارف أكون نفسي

و لا عارف اراضي الكل

واكون واحد من اللي 

خانوا وابتسموا

واكون واحد 

من اللي نافقوا وانقسموا 

مانيش عارف أكون هما

وبفصل نفسي م اللمة

شيزوفرينيا اغتراب النفس

ساكناني

لا أنا بوصل لحد الكل

ولا بوصل لعنواني .... .

هل اعجبك الموضوع :

تعليقات